İlham Əliyev Antalyada Əhməd Əl Şaraa ilə bir araya gəldi

Azərbaycan Prezidenti İlham Əliyevin Antalyada Suriyanın keçid dövrü rəhbəri Əhməd əl-Şaraa ilə keçirdiyi görüş regionun yeni siyasi mənzərəsini müəyyən edən mühüm hadisə kimi qiymətləndirilir. 5-ci Antalya Diplomatiya Forumu çərçivəsində baş tutan bu təmas, Suriyadakı hakimiyyət dəyişikliyindən sonra iki ölkə arasında qurulan ilk yüksək səviyyəli rəsmi münasibətdir. Görüşdə Suriyanın ərazi bütövlüyünün qorunması, daxili sabitliyin bərpası və Azərbaycanın işğaldan azad edilmiş ərazilərdə tətbiq etdiyi uğurlu yenidənqurma modelinin Suriyada istifadə olunması perspektivləri əsas müzakirə mövzusu olub. İlham Əliyev Azərbaycanın regionda sülh və əməkdaşlıq tərəfdarı olduğunu vurğulayaraq, Suriyanın yeni rəhbərliyini Bakıya rəsmi səfərə dəvət edib. Bu diplomatik gediş Azərbaycanın Yaxın Şərq siyasətindəki aktiv rolunu və regional sülhün təminatçısı kimi nüfuzunu daha da gücləndirir.