İlham Əliyev və Mehriban Əliyeva Gəncə şəhər stadionunda tikinti işlərinin gedişi ilə tanış olublar

Avqustun 20-də Prezident İlham Əliyev və birinci xanım Mehriban Əliyeva Gəncə şəhər stadionunda aparılan tikinti işləri ilə tanış olublar.

Gənclər və idman naziri Fərid Qayıbov dövlət başçısına və birinci xanıma görülən işlər barədə məlumat verib.

1959-1963-cü illərdə inşa olunmuş və 1964-cü ildə istismara verilmiş stadion son illər texniki baxımdan yararsız vəziyyətə düşmüşdü.

Prezident İlham Əliyevin 2023-cü ildə imzaladığı Sərəncama əsasən, stadionun yenidən qurulması üçün ilkin olaraq Prezidentin ehtiyat fondundan 1 milyon manat ayrılıb. 2024-cü ilin aprelində stadionun təməli qoyulub.

Yeni stadion UEFA-nın 4-cü kateqoriya standartlarına uyğun olaraq inşa edilir və 15 343 tamaşaçı tutumuna malik olacaq. Stadion ərazisi 12 hektardan çoxdur. Ərazidə köməkçi məşq meydançaları, futbol akademiyası, fiziki imkanları məhdud şəxslər üçün zonalar, VIP və media bölmələri, soyunma, tibb və texniki otaqlar, bilet satışı, ictimai iaşə obyektləri, avtodayanacaq və nəzarət məntəqələri yaradılır.

Tikinti işləri sentyabrda keçiriləcək III MDB Oyunlarının açılış və bağlanış mərasimlərinə hazırlıq çərçivəsində sürətləndirilib.