İran Azərbaycanla gərginliyi yenidən alovlandırır? - Siyasi şərhçidən açıqlama

Azərbaycanla İran arasında müxtəlif dövrlərdə müşahidə edilən gərginlik özünü Vətən müharibəsindən sonra daha qabarıq şəkildə büruzə verməyə başlayıb.

Buna baxmayaraq, hər dəfə məhz Bakının təşəbbüsü ilə münasibətlərin bərpası istiqamətində müəyyən addımlar atılıb, ölkəmiz sabitliyin təşviq edilməsi üçün üzərinə düşəni edib. Lakin rəsmi Tehran bunun əksinə, Ermənistana hərbi-siyasi dəstək verməklə gərginlik ocaqlarını yenidən alovlandırıb.

İranın öz ənənəvi siyasətindən əl çəkmədiyini indi də rəsmi şəxslərin timsalında görürük. İranın gah deputatları vasitəsilə Azərbaycanda terror aktına çağırış edilir, gah da Ermənistana silah daşınması ilə bağlı xəbərləri təkzib etməməklə təzyiq və təhdid ritorikası formalaşdırmağa səy göstərilir.

Maraqlıdır ki, bu gün regionda İran əleyhinə ən təhlükəli addımları qırmızı xətti adlandırdığı Ermənistan atır. Rəsmi İrəvanın dəvəti ilə Qərb təsisatları sərhədə yerləşir, Tehran tərəfindən düşmən adlandırılan Birləşmiş Ştatlar və ya Fransa kimi ölkələr bölgəyə cəlb edilir.

İran isə potensial təhlükəyə nəinki səssiz yanaşır, üstəlik, özünü zəhərləyəcək ilanı bəsləməyə davam edir. Bu isə ilk növbədə regional təhlükəsizliyə təhdid yaradır.

Azərbaycanın konstruktiv mövqe nümayiş etdirməsi fonunda İranın əksini göstərməsi Tehran rejiminin sabitlikdə deyil, gərginlikdə maraqlı olduğunu göstərir. Halbuki ikitərəfli münasibətlərin normal məcrada inkişafı hər iki xalqın maraqlarına daha çox xidmət edə bilər. Lakin görünən odur ki, İrandakı bəzi dairələr bu düşüncənin əksinə hərəkət etməyi daha məqbul hesab edir.