İrəvan revanşist addımlarını gücləndirib

Avropa İttifaqının müşahidə missiyasının Azərbaycan-Ermənistan sərhəddinə gəlməsindən sonra bu ölkə revanşist addımlarını daha da gücləndirib. Missiyanın gəlişindən sonra artıq neçənci dəfədir ki, İrəvan ənənəvi pozucu davranışlarını təkrarlayır.

Ermənistanın hazırkı davranışı onu göstərir ki, bu ölkə sanki İttifaqın gücünü hiss edərək, Azərbaycan hərbçisinin yaralanması ilə nəticələnən yeni təxribata əl atıb.

Təbii ki, hazırkı insidentə görə Ermənistanla yanaşı, Avropa İttifaqı da birbaşa məsuliyyət daşıyır. Çünki Azərbaycan daha əvvəl də bəyan etmişdi ki, İrəvan onun çətiri altında gizlənərək yeni təxribatlara rəvac verəcək.

Görünən odur ki, Ermənistan regionda sülhün və sabitliyin bərqərar olmasında maraqlı deyil. Əksinə, yeni forpostları ilə birgə gərginliyi artırmağa daha çox meyllidir. Bu isə regionda münasibətlərin normallaşmasına ciddi təhdid yaradır.