İsraillə Bakıda əldə edilən razılaşma ilə bağlı Türkiyədən açıqlama

“Türkiyə və İsrail Suriyada arzuolunmaz münaqişələrdən yayınmaq üçün mexanizmin yaradılması üzərində danışıqları davam etdirir”.

Bunu Türkiyə Müdafiə Nazirliyinin sözçüsü Zəki Aktürk deyib.

“Suriyada arzuolunmaz münaqişələrin qarşısını almaq üçün deeskalasiya mexanizminin yaradılması üzrə İsraildən olan həmkarlarımızla koordinasiyalı şəkildə texniki danışıqlar davam edir. Daha əvvəl də qeyd etdiyimiz kimi, rəsmi qurumların açıqlamalarından başqa xəbər və məlumatlara etibar edilməməlidir”, – Nazirliyin rəsmi nümayəndəsi bildirib.

Xatırladaq ki, sözügedən mexanizmin yaradılması barədə razılaşma İsrail və Türkiyə nümayəndə heyətləri arasında aprel ayında Bakıda keçirilmiş ilk görüşdə əldə edilib.

İki ölkənin nümayəndələri son olaraq ötən həftə yenə Azərbaycanın paytaxtında bir araya gəliblər. Həmin müzakirələrdə İsrail və Türkiyə aralarında “qaynar xətt”in yaradılmasını razılaşdırıb. İndiyədək tərəflər arasında Bakıda dörd görüşün keçirildiyi bildirilir.