İstanbulda keçirilən Zirvə görüşündə Bakı və İrəvan arasındakı sülh sazişi müzakirə olundu

İdeyası Azərbaycana məxsus olan “3+3” formatının növbəti iclası oktyabrın 18-də İstanbulda baş tutub.

Artıq bu səpkidə 2 toplantı keçirilib, bu isə 3-cü idi. Hələ də Gürcüstan tərəfi Rusiya ilə olan münasibətlərinə aydınlıq gətirmədiyi üçün görüşdə iştirakdan imtina edib.

Lakin bir müddətdir Gürcüstandan Rusiyaya doğru bir meyil müşahidə edilir. Hətta rəsmi Kremlin Gürcüstana Abxaziya və Osetiya ilə bağlı mübahisəni aradan qaldırmaq üçün yardım əli uzadacağı ilə bağlı fikirlər də var.

Mütəxəssislərin fikrincə, belə bir şey olacağı təqdirdə Gürcüstanın da bu formata qatılacağı istisna edilmir. Region ölkələri arasında əməkdaşlığı gücləndirmək üçün yaradılan bu formatın Azərbaycan və Ermənistan arasındakı münasibətlərə də tam aydınlıq gətirməsi gözlənilir.

İstanbuldakı görüşdə iştirak edən Azərbaycanın xarici işlər naziri Ceyhun Bayramov və erməni həmkarı Ararat Mirzoyan Sülh və Dövlətlərarası Münasibətlərin Qurulması haqqında Saziş ilə bağlı danışıqları davam etdirib, ən qısa zaman ərzində onun yekunlaşdırılması və bağlanması üçün daha çox səy göstərmək istiqamətində razılıq əldə ediblər.

Toplantının sonunda iştirakçı tərəflərin birgə bəyanatı qəbul edilib. Bəyanatda regional iqtisadi əməkdaşlığın ölkələrarası etimadın bərqərar olmasında və rifahın, sabitliyin artırılmasında oynadığı rol vurğulanıb. Nəqliyyat, kommunikasiya, ticarət, enerji, investisiya və inteqrasiya sahələrində əməkdaşlıq imkanlarını dəyərləndirmək barədə razılığa gəlinib.

Lakin bütün bunlara baxmayaraq, ekspertlər bu görüşün də digərləri ilə eyni sonla, yəni nəticəsiz bitdiyini düşünürlər.

Görüşlərin əsas məğzi regiona sülh gətirmək olsa da, təəssüf ki, böyük güclərin maraqları buna əngəl olur. Elə Azərbaycan və Ermənistan arasındakı bu anlaşmazlığın səbəbkarı da Ermənistanın Qərbdən güc alaraq sülhdən yayınmasıdır.