Kahramanmaraşda tikilən "Azərbaycan" məhəlləsi | 100 milyon dollarlıq dəstək

2023-cü il fevralın 6-da Türkiyədə baş vermiş dağıdıcı zəlzələdən bir il ötür.

Təbii fəlakət zamanı əraziyə ən çox xilasedici, həkim heyəti göndərməklə, maddi-mənəvi dəstək olmaqla Azərbaycan qardaş ölkəyə yardım əlini uzadan ilk dövlət olub.

6 fevral zəlzələsindən sonra göstərdiyi köməyə görə Azərbaycana minnətdarlıq əlaməti olaraq Kahramanmaraşda "Azərbaycan" məhəlləsinin salınması barədə qərar qəbul olunub və inşasına başlanılıb.

İndi zəlzələdən dağılmış Kahramanmaraş yenidən qurulur.

Ümumi sahəsi 32 hektar olan “Azərbaycan” yaşayış məhəlləsi 71 yaşayış binası, ibtidai məktəb, uşaq bağçası, mədəniyyət mərkəzindən ibarətdir. 4 mərtəbəli inşa ediləcək binalarda mənzillər 2, 3 və 4 otaqlı olacaq. Ümumilikdə 1323 mənzilin vətəndaşlara təhvil veriləcəyi gözlənilir.

Eyni zamanda ərazidə məskunlaşacaq sakinlərin iş yerləri ilə təmin olunması üçün yaşayış binalarında 799 ticarət obyekti istifadəyə veriləcək. Layihənin 100 milyon dollarını Azərbaycan hökuməti maliyyələşdirəcək.

Xatırladaq ki, mərkəzi Kahramanmaraş olmaqla 10 vilayətdə baş vermiş dağıdıcı zəlzələ zamanı 53 mindən çox insan həlak olub.