Kəndlər geri alınır, Ermənistanın Gürcüstan və İranla yolu bağlanır | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində növbəti analitik süjet hazırlanıb.

Süjetdə Azərbaycanın Ermənistan işğalında qalan səkkiz kəndinin qaytarılması məsələsinin yenidən aktuallaşmasından, rəsmi açıqlamalara əsasən, sərhədin delimitasiyası üzrə komissiyaların martın yeddisində keçirilən görüşündə Azərbaycanın işğal altında qalan kəndlərinin qaytarılmasını tələb etməsindən söz açılıb.

Bildirilib ki, söhbət Qazax rayonunun Bağanis Ayrım, Qızıl Hacılı, Aşağı Əskipara, Xeyrimli, Sofulu, Yuxarı Əskipara, Bərxudarlı və Sədərəyin Kərki kəndlərindən gedir. Rəsmi Bakı bununla bağlı “mərhələli həll” variantını irəli sürüb.

Birinci mərhələdə anklav olmayan dörd kənd – Bağanis Ayrım, Qızıl Hacılı, Aşağı Əskipara və Xeyrimli qaytarılmalıdır. İkinci mərhələdə isə anklavların – Sofulu, Yuxarı Əskipara, Bərxudarlı və Kərki kəndlərinin qaytarılması müzakirə olunmalıdır.

Qeyd olunub ki, Ermənistan prosesdən yayınmaq və məsələni arxa plana keçirmək istəyir:

“Bu məqsədlə “31 erməni kəndi” haqqında qondarma iddianı ortaya atıblar: “Hazırda Ermənistanda müzakirə edilən əsas mövzulardan biri də dörd kəndin qaytarılmasıdır. Rəsmi İrəvan bununla bağlı yayındırıcı açıqlamalar versə də, erməni ictimai rəyində kəndlərin tezliklə qaytarılacağı fikri hakimdir”.

Bununla bağlı “Ermənistan” fraksiyasından olan deputat Qarnik Danielyan bildirib ki, Azərbaycanın kəndlərlə bağlı tələbi yerinə yetiriləcək:

“Birinci mərhələdə dörd kənd qaytarılacaq, daha sonra digərləri. Bununla da Lori rayonu sərhəd bölgəsinə çevriləcək. Rəsmi Bakının tələb etdiyi kəndlərin qaytarılması ilə Ermənistanın şimal müdafiə xətti tamamilə məhv ediləcək.

Ermənistana qaz kəməri də bu istiqamətdən daxil olur. Beləliklə, Rusiyadan gələn qaz kəməri də Azərbaycanın nəzarətinə keçə bilər. Lori rayonu sərhəd bölgəsinə və Ermənistan isə “anklav ölkəyə” çevriləcək”.