Kimlər hərbi xidmətdən azad olunacaq? - Azər Babayev detalları açıqladı

Həqiqi hərbi xidmətə çağırışçıların yaşının 35-dən 30-a endirilməsi 2 övladı olan bir çox şəxsin hərbi xidmətdən azad olunmasına səbəb olacaq.

Bunu Milli Məclisin Müdafiə, təhlükəsizlik və korrupsiya ilə mübarizə komitəsinin iclasında Səfərbərlik və Hərbi Xidmətə Çağırış üzrə Dövlət Xidmətinin Həqiqi hərbi xidmətə çağırış baş idarəsinin rəisi Azər Babayev bildirib.

Qanun qəbul olunarsa, faktiki həmin kateqoriya insanlar çağırışdan azad olunacaqlar:

“Amma ümumiyyətlə, 2 uşağı olanların azad edilməsi heç Türkiyə təcrübəsində də yoxdur”.

Hərbi xidmət müddətinin 1 il 6 aydan 1 ilə endirilməsi məsələsinə toxunan idarə rəisi bunun hələ müzakirə edildiyini bildirib.

Şəffaflığın təmin olunması üçün çağırışın ancaq elektron qaydada olması təklif edilir.

Azər Babayevin sözlərinə görə, hərbi xidmət müddətinin azaldılmasında başqa yol düşünülür. Çünki ali təhsillilərlə orta təhsillilərin fərqləndirilməsi düzgün deyil.