Kiyevdə Azərbaycanın Müstəqillik Günü qeyd edildi | "Tariximizdə oxşar məqamlar var" - Baku TV

Azərbaycan Respublikasının müstəqilliyinin 108-ci ildönümü dünyanın bir çox ölkələrində olduğu kimi, Ukraynanın paytaxtı Kiyevdə də qeyd olunur.

Azərbaycanın Ukraynadakı səfirliyi tərəfindən təşkil olunan kütləvi tədbirdə Ukrayna rəsmiləri ilə yanaşı, bu ölkədə təmsil olunan müxtəlif ölkələrin diplomatik nümayəndəliklərinin rəsmiləri də qatılıb. O cümlədən, yerli ictimaiyyət, Azərbaycan diasporunun üzvləri də tədbirdə iştirak ediblər. Ukraynada davam edən müharibə səbəbindən tədbir ciddi təhlükəsizlik tələblərinə əməl edilməklə keçirilib.

Azərbaycanın və Ukraynanın dövlət himnlərinin səsləndirilməsi ilə başlayan qəbulda Azərbaycanın Ukraynadakı səfiri Seymur Mərdəliyev bildirib ki, 1918-ci il mayın 28-də müsəlman Şərqində ilk parlamentli respublika olan Azərbaycan Xalq Cümhuriyyəti yaradılıb.

Səfir Azərbaycanın müstəqillik uğrunda keçdiyi yoldan, Prezident İlham Əliyevin rəhbərliyi ilə ərazi bütövlüyünü bərpa etməsindən və beynəlxalq nüfuzunun artmasından danışıb.

O qeyd edib ki, Azərbaycan hazırda 16 ölkəyə təbii qaz ixrac edir və Avropanın enerji təhlükəsizliyində mühüm rol oynayır. Eyni zamanda, ölkənin yaşıl enerji layihələrinə böyük investisiyalar cəlb etdiyi, 2030-cu ilə qədər elektrik enerjisində bərpaolunan mənbələrin payının 40 faizə çatdırılmasının planlaşdırıldığı vurğulanıb.

Səfir Bakıda keçirilən WUF13 forumunun nəticələrindən də danışıb.

Ukrayna Ali Radasının vitse-spikeri Olena Kondratyuk və Prezident Ofisi rəhbərinin müavini İqor Jovkva isə iki ölkə arasındakı strateji tərəfdaşlıq münasibətlərini yüksək qiymətləndiriblər.

İqor Jovkva bildirib ki, Azərbaycan müharibə dövründə Ukraynaya enerji dəstəyini davam etdirib və bu yardımın həcmi 12 milyon dolları keçib.

Tədbirdə Azərbaycan mədəniyyəti və milli mətbəx nümunələri də təqdim olunub.