Kiyevdə Ulu Öndər Heydər Əliyevin xatirəsinə ağacəkmə aksiyası keçirilib - Baku TV

Ukraynanın paytaxtı Kiyevdə Ümummilli Lider Heydər Əliyevin anadan olmasının 103-cü ildönümü qeyd edilib.

Əvvəlcə Azərbaycanın Ukraynadakı səfirliyinin və SOCAR-ın Ukraynadakı nümayəndəliyinin kollektivləri, diaspor fəalları Kiyevdəki Heydər Əliyev Parkında Ulu Öndərin abidəsini ziyarət edib, xatirəsini ehtiramla anıblar.

Sonra Kiyevdə Azərbaycan-Ukrayna Dostluq Xiyabanında növbəti ağacəkmə aksiyası keçirilib. Səfirliyimizin və Ukrayna Azərbaycanlıları Birləşmiş Diasporunun birgə təşkilatçılığı ilə keçirilən ağacəkmə aksiyasında SOCAR-ın Ukraynadakı nümayəndəliyinin kollektivi, Kiyev Şəhər Şurasının deputatları, Kiyev Şəhər Meriyasının rəsmiləri də iştirak ediblər.

Kiyev Şəhər Şurasının deputatı Miroslava Smirnova Baku TV-nin Şərqi Avropa bürosuna açıqlamasında Azərbaycandan gələn dəstəyə görə təşəkkürünü bildirib:

“Bu gün bizim üçün çox əlamətdardır. Biz eyni zamanda Azərbaycanın dəstəyinə sahib olduğumuz üçün minnətdarıq. Hər birimiz başa düşürük ki, bu gün atəşlər altında dron zərbələri ilə əlaqədar Kiyevdə ekoloji vəziyyətə zərər dəyir. Ona görə də birlikdə belə bir ekoloji aksiyanı azərbaycanlı tarixi şəxsiyyətin doğum günündə keçirdik. Bu aksiyalar nəticəsində təmiz hava ilə nəfəs alacağıq”.