Kritik qərarlar verildi | Vaşinqton görüşündən sonra nələr yaşandı?

Pakistan Ermənistanla diplomatik münasibətlər qurmaq qərarına gəlib. Bu qərar Azərbaycanla məsləhətləşmələr aparıldıqdan sonra verilib.

Məlumatı "AnewZ" telekanalı yayıb.

Hər iki ölkənin xarici işlər nazirləri ötən həftə keçirilən görüşdə diplomatik münasibətlərin qurulması imkanlarının nəzərdən keçirilməsini razılaşdırıblar. Bununla yanaşı, Ermənistan və Pakistan avqustun 31-də Çinin Tiencin şəhərində iki ölkə arasında diplomatik münasibətlərin qurulması haqqında birgə kommünike imzalayıblar. Diplomatik münasibətlər Bakının sülh gündəliyi çərçivəsində razılaşdırılıb.

Qeyd edək ki, Azərbaycan, ABŞ və Ermənistan liderlərinin Vaşinqton görüşündən sonra İslamabadda müzakirələr aparılıb, bundan sonra isə sözügedən təşəbbüs razılaşdırılıb.

Xatırladaq ki, Pakistan İrəvanla münasibətlərini Ermənistanın Azərbaycan ərazilərinin işğalına başlamasından sonra dayandırıb və uzun illər ərzində Ermənistanı təcavüzkar dövlət kimi tanıyıb. O cümlədən İslamabad Azərbaycanın ərazi bütövlüyünü təsdiqləyən BMT Təhlükəsizlik Şurasının qətnamələrinin qəbul edilməsinə də əhəmiyyətli töhfə verib.

Ekspertlər qeyd edirlər ki, Pakistanın Ermənistanla münasibətlərini normallaşdırması Azərbaycanın sülh gündəliyinin bir elementi və Vaşinqton razılaşmalarının birbaşa nəticəsi kimi qiymətləndirilməlidir.