Laos Prezidenti “ASAN xidmət”də | “Bu fəaliyyəti yüksək qiymətləndirirəm, arzumdur ki...” - Baku TV

Laos Xalq Demokratik Respublikasının Prezidenti Thonqlun Sisulit ölkəmizə səfəri çərçivəsində “ASAN xidmət” mərkəzinin fəaliyyəti ilə tanış olub.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev qonağa Prezident İlham Əliyevin təşəbbüsü əsasında yaradılmış “ASAN xidmət” mərkəzləri və innovasiyalar sahəsində həyata keçirilən layihələr barədə ətraflı məlumat verib.

“ASAN xidmət”in intellektual məhsul kimi ixracı istiqamətində 50-dən çox ölkə ilə əməkdaşlıq edildiyi diqqətə çatdırılıb.

Laos Xalq Demokratik Respublikasının Prezidenti “ASAN xidmət”in fəaliyyətindən təsirləndiyini, onun innovativ və vətəndaş məmnunluğuna əsaslanan xidmət modelini yüksək qiymətləndirdiyini vurğulayıb:

“ASAN xidmət” mərkəzində göstərilən xidmətlər məndə çox müsbət təəssürat yaratdı. Mərkəz vətəndaşlara yüksək səviyyədə xidmət göstərmək, onların buradan məmnun və xoş təəssüratlarla ayrılmasını təmin etmək üçün əlindən gələni edir. Azərbaycan vətəndaşlarının “ASAN xidmət”in fəaliyyətindən məmnunluq səviyyəsinin 99,8 faiz olması çox yüksək göstəricidir və məndə böyük təəssürat yaratdı. Bu, vətəndaşların dövlətə hörmətini və etimadını da gücləndirir.

“ASAN xidmət” yalnız mərkəzlərdə xidmət göstərməklə kifayətlənmir, həm də səyyar avtobuslar vasitəsilə ucqar və kənd yerlərində yaşayan insanlara xidmətləri çatdırır. “ASAN xidmət”in fəaliyyətini yüksək qiymətləndirirəm. Həmçinin arzu edirəm ki, “ASAN xidmət” indiyədək olduğu kimi, bundan sonra da dünyanın müxtəlif ölkələrində mükafatlar qazanmağa və beynəlxalq səviyyədə tanınmağa davam etsin”.

O, ASAN təcrübəsinin öyrənilməsi və ölkəsində tətbiqi imkanlarının araşdırılması ilə bağlı müvafiq göstəriş verəcəyini bildirib.