Lavrov və Bayramov arasında vacib danışıq | Nələr müzakirə edildi?

Dekabrın 28-də Azərbaycan və Rusiya Prezidentlərinin telefon danışığının davamı olaraq xarici işlər nazirləri Ceyhun Bayramov ilə Sergey Lavrov arasında telefon danışığı aparılıb.

Rusiyanın xarici işlər naziri dekabrın 25-də Bakı-Qroznı marşrutu üzrə uçuş yerinə yetirən AZAL-a məxsus sərnişin təyyarəsinin faciəvi şəkildə qəzaya uğraması ilə bağlı həlak olanların ailələrinə və yaxınlarına, Azərbaycan xalqına başsağlığı diləklərini çatdırıb.

Həmçinin nazir Ceyhun Bayramov təyyarəyə ilkin baxışın, onun gövdəsində çoxsaylı dəliklərin olmasının, bələdçilərin və sərnişinlərin ifadələrinin təyyarənin fiziki-texniki xarakterli müdaxilə nəticəsində qəzaya uğradığı faktını təsbit etdiyini vurğulayıb.

Nazir ən qısa müddət ərzində beynəlxalq ekspertlərin də iştirakı ilə qəzanın səbəblərinin araşdırılması istiqamətində aparılan işin yekunlaşdırılması, səbəblərin ciddi və hərtərəfli şəkildə müəyyənləşdirilərək elan olunması istiqamətində Azərbaycan tərəfinin gözləntilərini qarşı tərəfin diqqətinə çatdırıb.