Lavrovdan Ermənistanla Azərbaycan haqqında açıqlama

"Rusiya Ermənistanla Azərbaycan arasında münasibətlərin normallaşması prosesinə hər cür kömək göstərir".

Bunu Rusiyanın xarici işlər naziri Sergey Lavrov müsahibəsində deyib. Onun sözlərinə görə, hazırda bu istiqamətdə danışıqlar gedir.

"Biz təmasların dinamikasını təyin edirik və gələcək sülh müqaviləsinin məzmununu müəyyənləşdiririk. Həm Azərbaycan, həm də Ermənistanla strateji tərəfdaşlıq və müttəfiqlik münasibətləri olan Rusiya bu prosesə hər iki tərəfin maraqlı olduğu istənilən formada və həcmdə yardım göstərir”, - deyə Sergey Lavrov bildirib.

Xatırladaq ki, sülh müqaviləsinin hazırlanması məsələlərini müzakirə etmək üçün dekabrın 23-də Moskvada Azərbaycan və Ermənistan xarici işlər nazirlərinin görüşü nəzərdə tutulmuşdu. Lakin rəsmi İrəvanın görüşdə iştirakdan imtinası səbəbindən danışıqlar ikitərəfli formatda, Azərbaycanın xarici işlər naziri Ceyhun Bayramov və rusiyalı həmkarı Sergey Lavrov arasında aparılıb.