Macarıstanla hərbi əlaqələr genişləndirilir

İyunun 7-də müdafiə naziri Zakir Həsənov ölkəmizdə rəsmi səfərdə olan Macarıstanın müdafiə naziri Kristof Szalay-Bobrovnicskinin rəhbərlik etdiyi nümayəndə heyətini qəbul edib.

Zakir Həsənov Azərbaycan-Ermənistan şərti sərhədində və Rusiya sülhməramlı kontingentinin müvəqqəti yerləşdiyi Azərbaycan ərazisində Ermənistan tərəfindən törədilən təxribatlar barədə ətraflı məlumat verib.

Bildirilib ki, qarşı tərəfin qanunsuz fəaliyyətlərinin qarşısının alınması məqsədilə Laçın yolunun son nöqtəsində sərhəd-keçid və nəzarət məntəqəsinin qurulması zərurətdən irəli gəlib və hazırda erməni sakinlərin keçid məntəqəsi ilə hər iki istiqamətdə hərəkəti təmin edilir.

Macarıstanlı nazir ölkəsinin Azərbaycanın ərazi bütövlüyünü tanıdığını və strateji tərəfdaşlığa əsaslanan Azərbaycan-Macarıstan ikitərəfli münasibətlərinin bir çox sahədə, o cümlədən hərbi sahədə də uğurla inkişaf etdiyini qeyd edib.