Makron nə üçün Azərbaycanla münasibətləri normallaşdırmağa məhkumdur? | Xarici şərhçi sirləri açdı

"Bizdən nə danışırlar?" verilişinin yeni buraxılışı efirə gedib.

Verilişdə bildirilib ki, Azərbaycanın beynəlxalq aləmdəki rolu, apardığı çoxşaxəli xarici siyasət xətti və qlobal çapda hiss olunan nüfuzu ötən həftə boyunca da xarici media resurslarında müzakirələrə səbəb olub.

Rusiyanın “Nezavisimaya Qazeta” nəşrində “Bakı şərtlər irəli sürür, İrəvan razılaşır, sonra yeni-yeni tələblər ortaya çıxır” başlıqlı məqalə dərc olunub.

“Ermənistan və Azərbaycan arasında sülh müqaviləsi Bakıda COP29 çərçivəsində imzalana bilər. Hər necə olursa-olsun, ekspertlər sülhün qısa müddətdə əldə olunması perspektivinə ehtiyatla yanaşırlar”, – məqalədə bildirilib.

Erməni politoloq Hayk Halatyan deyib:

“Bakı şərtlər irəli sürür, İrəvan razılaşır, sonra yeni-yeni tələblər ortaya çıxır. İndi Azərbaycanın öz siyasətindən əl çəkmək qərarına gələcəyinə şübhə edirəm.

Yalnız Azərbaycan tərəfinin nöqteyi-nəzərindən Cənubi Qafqazda erməni amilini büsbütün zərərsizləşdirən bir sənəd istisna ola bilər. Halbuki erməni cəmiyyətinin əhəmiyyətli hissəsi Nikol Paşinyanın təslimçi siyasətinin əleyhinədir. Bu adamlar Baş nazirin qəbul etdirməyə çalışdığı sülh müqaviləsinin şərtləri ilə heç vaxt barışmayacaqlar”.

Rusiyanın “Kommersant” qəzeti “Parisdə hesab edirlər ki, Bakı Təşəbbüs Qrupunun fəaliyyəti Fransanın təhlükəsizliyini təhdid edir və Bakı ilə münasibətlərin gərginləşməsini Fransanın Ermənistan-Azərbaycan münaqişəsinə dair mövqeyi ilə izah edirlər” başlıqlı məqalə dərc edib.

Mənbənin Fransadakı müxbiri Aleksey Tarxanov məqaləsində yazır ki, Paris özünün “dənizaşırı ərazilərində” sabitliyin pozulması cəhdlərində Yeni Kaledoniyada etirazçıları və bu günlərdə Bakıda qəbul edilən Fransa Polineziyası nümayəndələrini dəstəkləyən Azərbaycan hökumətini və parlamentini ittiham edir.