Melkonyan: "Rusiya Azərbaycanla müharibə başladacaq, əgər..."

Robert Köçəryan, Qagik Sarukyan və ya Samvel Karapetyanın Ermənistanda hakimiyyətə gəlişində maraqlı olan Rusiya yeni müharibədə də maraqlıdır.

Bunu Ermənistanın hakim “Mülki Müqavilə” partiyasından olan deputat Qagik Melkonyan deyib.

Deputatın sözlərinə görə, Serj Sarkisyan və Robert Köçəryanın hakimiyyətlərindən sonra Ermənistan və Azərbaycan arasında müharibə təhlükəsi qalxıb, dünya ölkəyə maraq göstərməyə başlayıb:

“Bu gün isə Ermənistana investisiya qoyuluşundan danışılır, buraya gəlirlər, çünki müharibə və təhlükə yoxdur, hər şey yeni başlayır. Aleksandr Lukaşenko bizi dövlət hesab etmirdi, deyirdi ki, ermənilər əlimizdən haraya qaçacaqlar, gedəcəkləri yer yoxdur. Amma indi müstəqilik, ruslar bizi nə qədər qorxutsalar da, öz yolumuzla gedə bilirik”.

Melkonyan qeyd edib ki, Rusiya öz məqsədləri naminə Ermənistanı qonşu ölkələrlə düşmən edib:

“Ermənistan liderləri düşünürdülər ki, Rusiya bizim “atamız”dır. Amma artıq bu “atalıq” bitir. Medvedev bütün günü içib bu barədə danışır. Əgər bizim üzümüzü görmək istəmirlərsə, qoy görməsinlər, ticarət etmək istəmirlərsə, qoy etməsinlər”.

Hakim partiyanın üzvü əlavə edib ki, rusiyalı oliqarx, Ermənistan baş nazirliyinə namizəd Samvel Karapetyan heç vaxt Rusiyanın maraqlarından imtina etməyəcək, çünki onun bütün var-dövləti oradadır:

“Onlar bizim əyalət olmağımız və boyunduruq altında qalmağımız üçün Rusiya uğrunda vuruşurlar. Əgər Robert Köçəryan, Samvel Karapetyan və ya Qagik Sarukyan hakimiyyətə gəlsə, Rusiya yenidən Ermənistan və Azərbaycan arasında müharibə başladacaq. Xalq Köçəryana nifrət edir, ondan iyrənir, geriyə yol yoxdur. Xalq Nikol Paşinyan və partiyasına səs verəcək ki, sülh olsun, əks halda bir gün Larsı, bir gün isə qaz kəmərini bağlayacaqlar”.