Mirzoyan İran XİN rəhbəri ilə mətbuata birgə bəyanatla çıxış etdi | Mühüm məqamlar

İran Ermənistan və Azərbaycan arasında sülh sazişinin tezliklə imzalanacağına ümid edir.

Ermənistan mediasının yaydığı məlumata görə, bu barədə İranın xarici işlər naziri Abbas Əraqçi İrəvanda erməni həmkarı Ararat Mirzoyanla birgə brifinqdə bildirib.

O vurğulayıb ki, Cənubi Qafqaz regionunun bütün problemləri güc tətbiq etmədən, diplomatiya yolu ilə həll edilməlidir.

Ermənistanın xarici işlər naziri Ararat Mirzoyan isə İrəvanın sülh sazişinin imzalanması üçün Azərbaycanla dialoqu davam etdirməyə hazır olduğunu bildirib.

A.Mirzoyan vurğulayıb ki, uzunmüddətli sülhün təmin edilməsi üçün qarşılıqlı məqbul həllərin tapılması ilə bağlı işi davam etdirmək, danışıqlar aparmaq lazımdır.

Brifinqdə A.Mirzoyan həmçinin bildirib ki, Ermənistan İranla illik ticarət dövriyyəsinin dəyərini 3 milyard ABŞ dollarına çatdırmağı planlaşdırır.

Onun sözlərinə görə, ötən il iki ölkə 755 milyon ABŞ dolları dəyərində ticarət əməliyyatları aparıb.

A.Mirzoyan həmçinin qeyd edib ki, İrəvan və Tehran yaxın zamanlarda İranda Ermənistan yük maşınlarına satılan dizel yanacağının qiymətinin artması ilə bağlı problemi həll edəcək.