Moskva bu plana uyğun gəlmir, İrəvan isə... | Rusiyalı politoloqdan Zəngəzur açıqlaması

"Azərbaycan və Türkiyə Zəngəzur dəhlizi məsələsində ABŞ və Avropa İttifaqına güzəştə getməyəcək".

Bunu rusiyalı politoloq Yevgeni Semibratov deyib.

Həmçinin ekspertin fikrincə, təkcə Qərb yox, Rusiya da məsələnin kənarında qalıb:

“Rusiyanın Zəngəzur dəhlizi ilə bağlı müzakirələrdən kənarlaşdırılması təkcə təntənəli addım deyil, həm də əsas oyunçuların regional arxitekturanın yenidən formalaşdırılması strategiyasının bir hissəsidir ki, Moskva bu plana uyğun gəlmir”.

Ermənistana gəlincə, Semibratov hesab edir ki, Rusiyanı dəhliz məsələsinin kənarında saxlamağa çalışan İrəvan öz təhlükəsizliyini Türkiyəyə təhvil vermək üzrədir.

Rusiyalı politoloqa görə, Zəngəzur məsələsində Avropa İttifaqı və ABŞ-nin rolu məhduddur:

"Bir çox Qərb ölkələrinin ermənipərəst əhvali-ruhiyyəsini və ABŞ-dəki güclü erməni lobbisini nəzərə alsaq, Qərbin bu işə qarışması Türkiyə üçün sərfəli deyil. İrəvanla üçbucaqda daha güclü mövqelərə malik olan Ankara və Bakının Qərbə güzəştə getməsi ehtimalı azdır".

Semibratov qeyd edib ki, Ermənistanın ABŞ və ya Fransadan bonuslar almaq üçün KTMT və Avrasiya İqtisadi Birliyindən çıxma ehtimalı hələ də azdır, amma bu baş verərsə, Rusiya hərbi bazasının Gümrüdən çıxarılması tələbi də daxil olmaqla, radikal addımlara səbəb ola bilər:

"Bu, 2006-2007-ci illərdə Rusiya bazalarının Gürcüstandan çıxarılması hadisəsində olduğu kimi, Rusiyanın geosiyasi maraqlarına ciddi zərbə olacaq".