Müqəddəs Taxt-Tacın dövlət katibi Bakıda
Azərbaycana səfərə gələn Müqəddəs Taxt-Tacın dövlət katibi kardinal Pietro Parolin iyulun 10-da Fəxri Xiyabanda Ümummilli Lider Heydər Əliyevin məzarını ziyarət edib. Həmçinin Şəhidlər Xiyabanında olan Pietro Parolin burada “Əbədi məşəl” abidəsi önünə gül dəstəsi qoyub.
Qonaq daha sonra Heydər Əliyev Mərkəzinə baş çəkib. Ona Mərkəzin fəaliyyət istiqamətləri və burada nümayiş olunan sərgilər barədə məlumat verilib. Mədəniyyət naziri Adil Kərimli ilə görüş zamanı isə Azərbaycan və Vatikan arasındakı mövcud əlaqələr, mədəniyyət sahəsindəki layihələr, o cümlədən muzeylər və kitabxanalar arasındakı əməkdaşlıq məsələləri müzakirə edilib.
Qeyd edək ki, Pietro Parolin Bakıda Tereza Ananın Mərhəmət bacıları sığınacağında və Müqəddəs Məryəm Ana Katolik Kilsəsində də olub. İyulun 11-dək davam edəcək səfər çərçivəsində Pietro Parolin həmçinin dini icmaların nümayəndələri ilə də görüşəcək. Qarşılıqlı hörmətə əsaslanan Azərbaycan-Vatikan əlaqələri böyük inkişaf yolu keçib və hazırda iki dövlət arasında siyasi dialoq yüksək səviyyədədir.
![icon](/images/loading.png)