Müstəmləkəçiliyin ağır nəticələri | BTQ və SAHEL ölkələrinin nümayəndələrinin birgə tədbiri

COP29 çərçivəsində Bakı Təşəbbüs Qrupu və Sahel Dövlətləri Konfederasiyasının birgə təşkil etdiyi “Afrikada investisiya perspektivlərinə müstəmləkəçiliyin mənfi təsirləri” adlı tədbir keçirilib.

Mərasimdə Afrikada kolonial keçmişin yaratdığı dərin sosial-iqtisadi problemlər və qitədə investisiya imkanlarına mənfi təsiri məsələləri müzakirə olunub.

Tədbirdə Fransanın Afrikadakı keçmiş müstəmləkələrindən, digər dənizaşırı ərazilərindən və Niderland müstəmləkələrindən nümayəndələr iştirak ediblər.

Komor Adaları Birliyinin Müdafiə Kollektivinin üzvü Abdu-Rauf Mustafa müstəmləkə altında olan xalqların üzləşdiyi problemlərə diqqət ayırdıqları üçün təşkilatçılara, xüsusilə də Bakı Təşəbbüs Qrupuna təşəkkürünü bildirib:

“Eyni mənfi hal Afrikanın bir çox ölkələrində, eləcə də Malidə var. Afrikada da biz bu mənfi halları yaşamışıq və hələ də yaşayırıq. Həqiqətən də, müstəmləkəçiliyin mənfi təsirləri çox olub və davam etməkdədir. Biz Sahel Dövlətləri Konfederasiyası, Mali, Niger və Burkina-Faso ilə birlikdə taleyimizi özümüzün həll etməsinə qərar verdik.

Dünyada təbii sərvətləri və xammalı ilə zəngin olan dövlətləri üçüncü dünya və ya kasıb ölkələr adlandırırlar. Halbuki bizim ölkələrin zəngin sərvəti onları böyük dövlətlər edib. Müstəmləkəçi ölkələr kasıb adlandırdıqları Afrikanın zəngin sərvəti sayəsində böyük dövlətlər olub. Biz qərara aldıq ki, ölkələrimizin təbii sərvətlərindən xalqımız bəhrələnməlidir. Ona görə də müstəmləkəçiliyə “yox” deyirik”.