Mutvalı Şıxlinski ilə bağlı məhkəmə hansı qərarı verdi? | Detallar açıqlandı

Yekaterinburqdakı Azərbaycan diasporunun rəhbərinin həbs olunan oğlu Mutvalı Şıxlinski barədə qətimkan tədbiri qüvvədə saxlanılıb.

Məhkəmənin bu qərarına səbəb Şahin Şıxlinskinin oğlunun guya hakimiyyət nümayəndəsinə qarşı zorakılıq etməsidir. O, 2025-ci il sentyabrın 14-dək həbsdə qalacaq.

Mutvalı Şıxlinskinin vəkili Pavel Korobov açıqlamasında bildirib ki, bu qərar qanuni deyil. İstintaq zamanı sübut olaraq Mutvalı və Şahin Şıxlinskilərin saxlanıldığında hakimiyyət orqanlarının işçilərinin avtomobilə etdikləri hücum və onlara qarşı sərt davranışların əks olunduğu kadrları nəzərdən keçirilməsini tələb etsələr də, hakim videoya baxıb, qiymət verməkdən imtina edib:

“Hər bir kəs sosial şəbəkələr və ya mətbuat orqanlarında hadisə baş verən zaman çəkilərək yayımlanan videolara baxaraq görə bilər ki, iddia olunduğu kimi, Mutvalı Şıxlinskinin hakimiyyət nümayəndəsinə qarşı zorakılıq etmə halı yoxdur. Real olmayan ittihamlar irəli sürülüb. Biz bu mübahisəli qərarı rədd edirik. Şəxsin müdafiə hüququndan məhrum edilməsi də adlandırmaq olar. Kassasiya məhkəməsinə müraciət etməyi planlaşdırırıq. İddia olunur ki, guya Mutvalı Şıxlinski qəsdən hüquq-mühafizə orqanlarının işçilərinə xəsarət yetirib, onlarla əlbəyaxa davaya keçib. Lakin bu belə deyil”.