NATO-Rusiya müharibəsi realdır? - Milyonlarla insan üçün təhlükəli vəziyyət yarandı - Baku TV

Avropada Rusiya ilə mümkün qarşıdurma ilə bağlı narahatlıqlar artır. NATO ölkələrinin hava məkanının pozulması, Avropa liderlərinin Rusiyanın mümkün hücumu barədə xəbərdarlıqları fonunda Rusiya-NATO müharibəsinin nə dərəcədə real olduğu müzakirə olunur.

Siyasi şərhçi Elçin Alıoğlunun sözlərinə görə, Rusiyanın hazırda Avropa ilə birbaşa müharibəyə başlamaq niyyəti yoxdur.

Ekspert hesab edir ki, bəzi Avropa siyasətçiləri seçki ərəfəsində Rusiya təhlükəsi mövzusundan siyasi məqsədlərlə istifadə edirlər.

“Rusiyanın Avropa ilə müharibə etmək niyyəti yoxdur. Lakin Rusiya NATO ölkələrinə hücum edə bilər. Məsələn, Baltikyanı ölkələrdə NATO qüvvələrinin sayının az olması müəyyən risklər yaradır”, – E.Alıoğlu deyib.

Siyasi şərhçi Rusiyanın yeni qarşıdurmalara gedə biləcəyini də iddia edib.

“Rusiya Ukrayna müharibəsindən sonra qətiyyən sakitləşməyəcək. Postsovet məkanında onun növbəti hədəfləri var. Bu ölkələrlə Rusiya bu və ya digər formatda qarşıdurmaya gedə bilər”, – deyə ekspert bildirib.