Nəhəng investisiya şirkətləri Bakıya gəlmək üçün növbə gözləyir

Nyu-York – dünyanın siyasi və maliyyə mərkəzlərindən biri. Prezident İlham Əliyevin BMT Baş Assambleyasında iştirakı çərçivəsində keçirdiyi görüşlər də qlobal medianın gündəmindədir.

Dövlət başçısı dünyanın alternativ investisiyalar sahəsində ən iri idarəedici şirkətlərindən olan “Brookfield Asset Management”, “Neuberger Berman” və “Blackstone”un rəhbərləri ilə görüşüb.

Xüsusi məqam ondan ibarətdir ki, bütün bu görüşlər qarşı tərəfin müraciəti əsasında baş tutub. Bu isə Azərbaycanın iqtisadi cazibədarlığına və Prezident İlham Əliyevin rəhbərliyi ilə həyata keçirilən islahatlara beynəlxalq maliyyə dairələrinin artan marağının göstəricisidir.

Azərbaycanın bu qlobal maliyyə nəhəngləri ilə quracağı gələcək tərəfdaşlıq yeni iqtisadi imkanlar açmaqla yanaşı, strateji inkişaf hədəflərinə də xidmət edə bilər.

Görüş zamanı hər üç şirkət Azərbaycanda müxtəlif sahələrin inkişafına yönəlmiş əməkdaşlıq təşəbbüsləri ilə çıxış edib. Prezident İlham Əliyev bütün görüşlərdə Azərbaycanın iqtisadi modelinin şəffaflıq, sabitlik və davamlı inkişaf prinsipləri üzərində qurulduğunu vurğulayıb.

O həmçinin Azərbaycanın bərpaolunan enerji sahəsində regional mərkəzə çevrildiyini və yeni əməkdaşlıqlar üçün geniş imkanların yarandığını diqqətə çatdırıb.

Əldə olunan razılaşmalar Azərbaycanın maliyyə sektorunun beynəlxalq inteqrasiyasını dərinləşdirməklə yanaşı, ölkəmizin gələcək strateji tərəfdaşlıqları üçün də möhkəm zəmin yaradır.