Nəyi nə zaman etmək lazım olduğunu hər kəs gördü

Davamlı hərbi təxribatlar və yeni ərazi iddiaları ilə 2020-ci ildə kövrək atəşkəsi pozub yenidən iki ölkə arasında müharibəyə səbəb olan Ermənistan bu savaşda biabırçı məğlubiyyətə uğradı. Lakin 44 günlük müharibənin yaratdığı reallıq işğalçı tərəfə tam dərs olmadı.

Ermənistan 2020-ci il 10 noyabr tarixli üçtərəfli bəyanat əsasında üzərinə götürdüyü öhdəlikləri tam yerinə yetirmədi. Məhz bunun nəticəsidir ki, Azərbaycan Ordusu sentyabrın 19-da 23 saatlıq lokal xarakterli antiterror tədbirləri keçirməyə məcbur oldu.

Antiterror tədbirləri bölgədəki separatçı rejimə qarşı həm də növbəti sarsıdıcı zərbə oldu. Beynəlxalq hüquqa əsaslanan bu əməliyyat nəticəsində Azərbaycan qarşıya qoyulan bütün hədəflərə nail oldu, bütün kommunikasiyalar, yollar, yüksəkliklər nəzarətə götürüldü. Bu, ümummilli lider Heydər Əliyevin müəyyən etdiyi dövlətçilik strategiyasının Prezident İlham Əliyev tərəfindən uğurla davam etdirilməsini bir daha göstərdi. Bu siyasətin məqsədyönlü şaxələndirilməsi Azərbaycanın müasir dövlətçilik anlayışının mənası və mahiyyətidir.

Prezident İlham Əliyevin “nəyi nə zaman etmək” barədə siyasi-fəlsəfi məzmunlu açıqlaması vaxtında verilmiş düzgün siyasi qərar və onun mükəmməl icrası arasında sarsılmaz vəhdətdir.