Ombudsman həbsdəki diversantlara baş çəkib

İnsan hüquqları üzrə müvəkkil Səbinə Əliyeva və Ombudsmanın İşgəncələrin qarşısının alınması üzrə Milli Preventiv Qrupunun üzvləri Zəngilanın Rəzdərə kəndi ərazisində Azərbaycan dövlət sərhədini pozmağa cəhd edən erməni diversantlara baş çəkib.

Ombudsman Aparatından bildirilib ki, Ermənistan Silahlı Qüvvələrinin hərbi qulluqçuları Hovaqimyan Harut Yuriki və Qazaryan Karen Aşoti konfidensial qaydada qəbul olunub, müraciətləri dinlənilib. Hər iki şəxsin saxlanma şəraitindən və rəftardan şikayətləri olmayıb. Onlar yaradılan şəraitə görə Azərbaycan dövlətinə minnətdarlıq ediblər.

Başçəkmə çərçivəsində saxlanma şəraiti – kameraların vəziyyəti, şəxsi gigiyena və sanitariya şəraiti, tibbi xidmət, qidalanma məsələləri yerində araşdırılıb. Onlara beynəlxalq hüquq normalarına uyğun hüquqlarının, lazımi tibbi-psixoloji xidmətin təmin olunduğu müşahidə edilib və özləri də bunu təsdiq ediblər. Saxlanılan şəxslər üçün kameralarda öz dillərində bədii ədəbiyyat və informasiya materialları yerləşdirilib.

Qeyd edək ki, mayın 26-da saxlanılan erməni diversantlar məhkəmə qərarı ilə Azərbaycan dövlət sərhədinin pozulması və digər qanunsuz əməllərin törədilməsində təqsirləndirilirlər.