Pakistanlı komandan Bakıda | MN məlumat yaydı

Azərbaycan Hərbi Dəniz Qüvvələrinin komandanı 1-ci dərəcəli kapitan Şahin Məmmədovla ölkəmizdə səfərdə olan Pakistanın Hərbi Dəniz Qüvvələri komandanı admiral Navid Əşrəf arasında görüş keçirilib.

Bu barədə məlumatı Müdafiə Nazirliyi yayıb.

Görüş zamanı Azərbaycan və Pakistan Hərbi Dəniz Qüvvələrinin qarşılıqlı əlaqələrinin inkişaf perspektivləri ətrafında geniş fikir mübadiləsi aparılıb, döyüş gəmilərinin heyətləri arasında təcrübə mübadiləsinin aparılmasının əhəmiyyəti vurğulanıb və bir sıra digər məsələlər müzakirə olunub.

Daha sonra Hərbi Dəniz Qüvvələri bazasını ziyarət edən pakistanlı qonaqlar üçün təşkil edilən brifinqdə Azərbaycan Hərbi Dəniz Qüvvələrinin strukturu, əməliyyat imkanları, Xəzər dənizinin Azərbaycana aid hissəsində fəaliyyəti, şəxsi heyət üçün yaradılmış şərait, təlim-tədris prosesi, eləcə də xidməti-döyüş fəaliyyətinin təşkili barədə ətraflı məlumat verilib.

Səfər çərçivəsində Pakistan nümayəndə heyəti həmçinin Hərbi Dəniz Qüvvələrinin "N" hərbi hissəsində olub. Hərbi hissə ilə tanışlıqdan sonra qonaqlar dəniz xüsusi təyinatlılarının nümunəvi çıxışlarını izləyiblər.