Paşinyan Putin və Pezeşkiana zəng etdi | Telefon danışığının detalları

Ermənistanın Baş naziri Nikol Paşinyanla Rusiya Prezidenti Vladimir Putin arasında telefon danışığı olub.

Ermənistan hökumətinin mətbuat xidmətinin məlumatına görə, Paşinyan söhbət zamanı avqustun 8-də Vaşinqtonda keçirilmiş danışıqların nəticələri barədə Putinə məlumat verib.

Bu çərçivədə Ermənistan və Azərbaycan arasında sülh və dövlətlərarası münasibətlər haqqında sazişin paraflanması, ATƏT-in Minsk qrupunun buraxılması ilə bağlı birgə müraciət, regionda nəqliyyat-kommunikasiya xətlərinin açılması məsələləri, həmçinin Beynəlxalq Sülh və Rifah naminə Tramp marşrutu layihəsi müzakirə olunub.

Paşinyan bunun təkcə Ermənistan və Azərbaycan üçün deyil, regiondakı bütün ölkələr üçün yeni imkanlar yaradacağını bildirib. Tərəflər fəal təmasları və siyasi dialoqu davam etdirmək barədə razılığa gəliblər.

Nikol Paşinyan həmçinin İran Prezidenti Məsud Pezeşkianla da telefon danışığı aparıb. Bildirilir ki, onlar Vaşinqtonda Bakı ilə İrəvan arasında əldə edilmiş razılaşmaları müzakirə ediblər.

Paşinyan regional kommunikasiyaların ölkələrin ərazi bütövlüyü, suverenliyi və yurisdiksiyası prinsipi əsasında fəaliyyət göstərəcəyi barədə Pezeşkianı məlumatlandırıb. O həmçinin İran Prezidentinin İrəvana gözlənilən səfərinin əhəmiyyətini qeyd edib.