Paşinyandan “Tramp marşrutu“ barədə önəmli açıqlamalar

“Bizim ordumuzun məqsədi Ermənistanın beynəlxalq səviyyədə tanınmış ərazi bütövlüyünü müdafiə etməkdir. Söhbət döyüş qabiliyyətli yox, müdafiə ordusundan gedir. Döyüş qabiliyyətli ordu hansı tapşırığı yerinə yetirəcək?”.

Bu sözlər Ermənistanın Baş naziri Nikol Paşinyana məxsusdur.

Paşinyan bu sözlərlə bəzi revanşist əhvali-ruhiyyəli ermənilərə xatırladıb ki, Azərbaycanla müharibə başa çatıb.

Onun sözlərinə görə, düzgün ordu ideologiyası olmasa, xaos yaranar. “Hazırda isə orduda siyasidən çox kriminal konsepsiya mövcuddur”, ‒ deyə Ermənistanın Baş naziri təəssüflənib.

Nikol Paşinyan “Tramp marşrutu” barədə də danışıb. Onun fikrincə, dəhliz Ermənistanı blokadadan çıxaracaq. Həmçinin Naxçıvanla Azərbaycanın digər əraziləri arasında quru əlaqəsi bərpa olunacaq.

“Gəlin Ermənistan ərazisindən boru kəmərinin keçdiyini təsəvvür edək. Bu boru kəmərinin hara istiqamətləndiyinin fərqi yoxdur. Sual başqadır. Bu, Ermənistanla Azərbaycan arasında sülh faktorudur? Əlbəttə ki, bu, faktordur. Bu faktorun yoxluğu problem yaradır”, ‒ deyə Paşinyan bildirib.

Ermənistanın Baş naziri “Tramp marşrutu”nu sülh faktoru adlandırıb. O hətta təhlükəsizlik zəmanətinin də olduğunu qeyd edib.

“Bu gün Ermənistan heç vaxt olmadığı qədər müstəqil, suveren və təhlükəsizdir. Əgər yazda Ermənistanla Azərbaycan arasında müharibə olmayacağını, barışığın əldə ediləcəyini deyirdimsə, indi bəyan etmək istəyirəm ki, İrəvanla Bakı arasında artıq sülh var”, ‒ deyə Paşinyan əlavə edib.