Paşinyandan “Tramp marşrutu“ barədə önəmli açıqlamalar

Ermənistanın Baş naziri Nikol Paşinyan ölkənin hərbi doktrinası və regionun iqtisadi gələcəyi üçün həlledici hesab edilən "Tramp marşrutu" barədə mühüm bəyanatlarla çıxış edib. Paşinyan qeyd edib ki, Ermənistan silahlı qüvvələrinin əsas məqsədi yalnız ölkənin beynəlxalq səviyyədə tanınmış ərazi bütövlüyünü qorumaqdan ibarət olmalıdır. Baş nazir revanşist meyillərin ölkədə xaos yarada biləcəyini vurğulayaraq, orduda cinayətkar konsepsiyaların siyasi ideologiya ilə əvəz edilməsinin vacibliyini bildirib. Regional layihələrə toxunan Paşinyan, "Tramp marşrutu"nun Ermənistanı illərdir davam edən blokadadan xilas edəcəyini və Naxçıvanla Azərbaycanın digər əraziləri arasında birbaşa quru əlaqəsini təmin edəcək strateji bir sülh faktoru olduğunu xüsusi qeyd edib. O, həmçinin Ermənistan ərazisindən keçən enerji xətlərinin və nəqliyyat dəhlizlərinin əlavə təhlükəsizlik zəmanəti yaratdığını bildirərək, hazırda İrəvan və Bakı arasında real sülhün bərqərar olduğunu bəyan edib.