Prezident 29-cu "Caspian Oil&Gas" və 12-ci "Caspian Power" sərgilərinin açılışında

Prezident İlham Əliyev Bakı Ekspo Mərkəzində Bakı Enerji Həftəsi çərçivəsində keçirilən 29-cu Beynəlxalq Xəzər Neft və Qaz – “Caspian Oil&Gas” və 12-ci Xəzər Beynəlxalq Energetika və Yaşıl Enerji – “Caspian Power” sərgisinin açılışında iştirak edib.

Dövlət başçısı bildirib ki, bu tədbir ilk dəfə 1994-cü ildə keçirilib və o vaxtdan Azərbaycanın enerji sektoruna birbaşa xarici sərmayənin cəlb edilməsində çox vacib rol oynayıb. Həmin vaxtdan bu tədbirin miqyasının genişləndiyini və Bakı Enerji Həftəsi adlandırıldığını vurğulayan Prezident İlham Əliyev Bakı Enerji Həftəsinin enerji siyasətinin bütün seqmentlərini – neft, qaz, emal, ixrac və yaşıl enerjini əhatə etdiyini bildirib.

Ölkə başçısı qeyd edib ki, Azərbaycan qaz təchizatı məsələlərində özünü etibarlı tərəfdaş kimi artıq sübut edib. Bu gün 8 ölkə Azərbaycan qazını idxal edir deyən dövlət başçısı ölkəmizin qaz ixracının 24 milyard kubmetrdən artıq olduğunu bildirib.

Prezident əlavə edib ki, “Şahdəniz” layihəsi qaza olan qıtlığı aradan qaldırıb.

“Təchizatımızın coğrafiyası bundan sonra genişlənəcək. Biz bir sıra ölkələrlə fəal danışıqlar mərhələsindəyik. Onların da Azərbaycan qazına ehtiyacı var. Biz onların enerji təhlükəsizliyini təmin edəcəyik”, – deyə İlham Əliyev bildirib.