Prezident 5 polkovnikə general-mayor rütbəsi verdi

İyunun 25-də Prezident İlham Əliyev Müdafiə Nazirliyinin hərbi qulluqçularının bir qrupuna ali zabit rütbəsinin verilməsi ilə bağlı sərəncam imzalayıb. Sərəncama əsasən, 5 hərbi qulluqçu “general-mayor” ali hərbi rütbəsinə layiq görülüb.

Dövlət başçısının imzaladığı digər sərəncamla Azərbaycanın müstəqilliyinin, ərazi bütövlüyünün qorunub saxlanılmasında xüsusi xidmətlərinə, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqləndiklərinə görə 131 hərbi qulluqçu orden və medallarla təltif olunub. Onlardan 21 nəfəri ölümündən sonra orden və medallara layiq görülüb.

Hərbçilərdən 4 nəfər “Azərbaycan Bayrağı”, 3 nəfər 3-cü dərəcəli “Rəşadət”, 9 nəfər 3-cü dərəcəli “Vətənə xidmətə görə” ordenləri ilə təltif edilib.

Bundan başqa, 16-sı ölümündən sonra olmaqla 34 nəfər “Vətən uğrunda”, 22 nəfər “İgidliyə görə”, 20 nəfər “Cəsur döyüşçü”, 17 nəfər “Döyüşdə fərqlənməyə görə”, 1 nəfər isə ölümündən sonra “Suqovuşanın azad olunmasına görə”, 2 nəfər ölümündən sonra “Xocavəndin azad olunmasına görə”, 1 nəfər ölümündən sonra “Kəlbəcərin azad olunmasına görə”, eləcə də 1-i ölümündən sonra olmaqla 18 nəfər “Hərbi xidmətlərə görə” medallarına layiq görülüb.