Prezident Bakıda Zəfər parkında aparılan tikinti işləri ilə tanış oldu

Prezident İlham Əliyev Bakıda Zəfər parkında aparılan tikinti işləri ilə tanış olub.

“PMD Projects” şirkətinin direktoru Nəriman Topçubaşov məlumat verib ki, giriş portalın sağ və sol tərəflərinin hər birində 22 olmaqla ümumilikdə 44 tağ istifadə edilib.

Qələbəyə aparan rəmzi yolun başlanğıcını tərənnüm edən tağın hündürlüyü isə 44 metrdir.

Giriş portalından sonra ziyarətçilər sonsuzluğu və Zəfər gününü simvolizə edən 8 Noyabr memorial abidəsini ziyarət edə biləcəklər. Memorial abidənin ətrafında Qarabağ xalçalarındakı naxış və bəzək elementlərini əks etdirən yaşıllıq salınacaq. Zəfər muzeyinə isə park ərazisindən iki istiqamətdə giriş təmin edilib.

Ziyarətçilər muzeyi gəzdikdən sonra park hissəsinə daxil ola biləcəklər. Zəfər parkında həmçinin tematik bağça, kaskad tipli şəlalə, Qarabağ yaddaş bağçası və parka ümumi baxış nöqtəsi yaradılacaq. Parkın sonunda Azadlıq Bayrağı Meydanının inşası planlaşdırılır. Yaddaş bağçası parkın son hissəsində yaradılacaq.