Prezident İranda Azərbaycana qarşı edilən çıxışlara münasibət bildirdi

“Yeni hökumətlə bağlı olan münasibətləri hələ ki, təhlil etmək çətindir. Çünki mənim şəxsən yeni prezidentlə görüşüm olmayıb. Nə vaxtsa olsa, onda bu barədə danışa bilərəm”.

Bunu Prezident İlham Əliyev yerli telekanallara müsahibəsində İranla münasibətlərdən danışarkən deyib.

“Əyalət mollasının bizə qarşı nifrət münasibəti ilk deyil. Ərdəbil şəhərinin o mollası dəfələrlə Azərbaycana, xalqımıza və mənə qarşı təhqiramiz ifadələr işlədib. Burada sual ondan ibarətdir ki, onu o vəzifəyə təyin edən adam buna necə münasibət göstərir. Axı o, özbaşına gəlib orada oturmayıb. Biz yaxşı bilirik ki, onu kim təyin edir. Onun reaksiyası nədir, o, bunu dəstəkləyir, yoxsa yox və Azərbaycandan kim üzr istəyəcək? Üzr istəyəcəklər, yoxsa yox?

İranın Xarici İşlər Nazirliyinin açıqlamasındakı təəssüf hissi kifayət deyil. Burada həm Türkiyə, həm Azərbaycan prezidentləri, həm də xalqlarımız açıq təhqir olunub. Bu qəbuledilməzdir.

Ona görə də biz hesab edirik ki, o əyalət mollası cəzalandırılmalıdır. Ən azı vəzifəsindən qovulmalı və Azərbaycandan üzr istəməlidir”, – dövlət başçısı bildirib.