Prezident Misir parlamentinin Nümayəndələr Palatasının sədrini qəbul edib

Prezident İlham Əliyev mayın 15-də Misir Ərəb Respublikası parlamentinin Nümayəndələr Palatasının sədri Hanaf Ali Əl Gebalini qəbul edib.

İlham Əliyev Misir parlamenti Nümayəndələr Palatasının sədrinə ümummilli lider Heydər Əliyevin 100 illiyinə həsr olunmuş Azərbaycan Respublikası Milli Məclisinin xüsusi iclasında iştirakına görə təşəkkürünü bildirib.

Ulu öndərin Azərbaycanın dövlət quruculuğunda müstəsna rol oynamış bir şəxsiyyət olduğunu vurğulayan dövlət başçısı eyni zamanda ümummilli liderin Azərbaycan-Misir əlaqələrinin inkişafında böyük xidmətləri olduğunu qeyd edib.

İlham Əliyev Misir Prezidenti Əbdülfəttah Əs-Sisinin Azərbaycana səfərini məmnunluqla xatırlayıb, bu səfərin əlaqələrimizin inkişafına ciddi təkan verdiyini deyib, səfər zamanı Azərbaycanla Misir arasında müxtəlif istiqamətlərdə, o cümlədən iqtisadi-ticarət əlaqələrinin inkişafı, enerji, kənd təsərrüfatı, səhiyyə və digər sahələrdə əməkdaşlıq məsələlərinin müzakirə olunduğunu qeyd edib.

Dövlət başçısı onun salamlarını Misirin Prezidentinə çatdırmağı xahiş edib.