Putin Türkiyə ilə əlaqələri təqdir edir

“Türkiyə Prezidenti Rəcəb Tayyib Ərdoğan ölkəsinin iqtisadiyyatı üçün çoxlu işlər görüb”.

Bunu Rusiya Prezidenti Vladimir Putin Akkuyu Atom Elektrik Stansiyasının açılış mərasimində videokonfrans zamanı çıxışında deyib. Rusiya lideri qeyd edib ki, Türkiyə qarşısına qoyduğu hədəflərə çatmağı bacarır.

“Türkiyə-Rusiya əlaqələri regionda sülh və sabitliyə töhfə verir. Biz bu əməkdaşlıqdan məmnunuq” deyən V.Putin əlavə edib ki, Akkuyu AES Türkiyə-Rusiya tarixində ən böyük ortaq layihələrdən biridir.

Putin vurğulayıb ki, ikitərəfli tərəfdaşlığın kökündə dayanan amil xoş qonşuluq əlaqələri və qarşılıqlı hörmətdir. “Biz bundan sonra iqtisadi əlaqələrimizi daha da gücləndirəcəyik.

Türkiyə artıq nüvə enerjisinə sahib olan bir ölkədir”, – deyə Rusiya lideri əlavə edib. V.Putin fevralın 6-da Türkiyədə baş vermiş dağıdıcı zəlzələnin fəsadlarının aradan qaldırılmasında Rusiyanın əlindən gələni etməyə hazır olduğunu da bildirib. Onun sözlərinə görə, Rusiya Türkiyəyə tibbi yardım və xilasetmə qrupu göndərən ilk ölkələrdəndir.