Qarabağ Universiteti ilə bağlı yenilik | İlham Əliyev fərman imzaladı

Qarabağ Universitetinin tabeliyində “Qarabağ Universitetinin Klinikası” publik hüquqi şəxs yaradılır.

Bununla bağlı Prezident İlham Əliyev Fərman imzalayıb.

Qeyd edilib ki, Klinika Qarabağ Universitetində tibb ixtisasları üzrə təhsil alan tələbələrin peşəkar kadr kimi hazırlanmasını təmin edən, tibb sahəsində elmi tədqiqatlar aparan, regionda əhalinin sağlamlığının qorunmasında iştirak edən publik hüquqi şəxsdir.

Azərbaycan Prezidentinə Klinikanın yenidən təşkili və ləğv edilməsi, Elm və Təhsil Nazirliyinə bu Fərmanın 3.1-ci bəndində qeyd edilənlər istisna olmaqla, “Publik hüquqi şəxslər haqqında” Azərbaycan Respublikası Qanununun 8.2-ci maddəsində publik hüquqi şəxsin təsisçisinin səlahiyyətlərinə aid edilmiş digər məsələlərin həlli həvalə edilib.

Nazirlər Kabinetinə Fərmandan irəli gələn məsələləri həll etmək, Elm və Təhsil Nazirliyinə isə Klinikanın nizamnaməsini iki ay müddətində təsdiq etmək tapşırılıb.

Maliyyə Nazirliyi isə Klinikanın 2025-ci ildə saxlanılma xərclərinin maliyyələşdirilməsi üçün dövlət büdcəsindən 5 milyon manat vəsaiti Qarabağ Universitetinə ayıracaq. Bundan başqa, Klinika mərhələlərlə tam özünümaliyyələşdirmə səviyyəsinə çatanadək növbəti illərin dövlət büdcəsindən zəruri maliyyə vəsaitinin nəzərdə tutulmasını təmin edəcək.