Qaribaşvili istefadan əvvəl niyə Azərbaycan əleyhinə sənəd imzaladı?

Ötən həftəsonu Ermənistanın Baş naziri Nikol Paşinyan gürcü həmkarı İrakli Qaribaşvili ilə Tiflisdə strateji tərəfdaşlıq haqqında saziş imzaladı.

Azərbaycanın icra etdiyi regional layihələrdən ən çox qazananın Gürcüstan olduğunu xatırladan siyasi analitiklər bildirir ki, buna rəğmən Qaribaşvili hökumətinin bu cür davranışı böyük təəssüf doğurur.

Gürcüstanın son zamanlarda sərgilədiyi mövqe çox təəssüf ki, uzun illər Azərbaycanla davam edən ikitərəfli əlaqələrin zədələnməsinə xidmət edir. Ekspertlərə görə, rəsmi Bakı Tiflisə bununla bağlı narazılığını ifadə etməlidir.

Qeyd edək ki, Gürcüstanın Baş naziri və hökuməti yanvarın 29-da istefaya gedib. Gürcüstan Konstitusiyasına əsasən, baş nazirin səlahiyyətləri onun istefasından dərhal sonra başa çatır, hökumət isə yeni baş nazir təyin olunana qədər öz vəzifələrini icra etməyə davam edir. Hökumət başçısının vəzifələri baş nazirin birinci müavininə həvalə edilir. Ölkənin bütün nazirləri nazir səlahiyyətlərini müvəqqəti icra edəcəklər. İndi Gürcüstan parlamentinin yeni baş nazirə və onun təqdim etdiyi hökumətə etimad göstərməsi üçün iki həftə vaxtı var. Etimad qazanmaq üçün hökumət azı 76 parlament üzvünün dəstəyini almalıdır.

Hazırda Azərbaycan ictimaiyyətini bir neçə vacib sual maraqlandırır: Qaribaşvilinin istefasından bir neçə gün öncə Paşinyanla imzaladığı strateji tərəfdaşlıq haqqında sazişin Azərbaycan üçün hansı mənfi təsirləri ola bilər? Ermənistana yönəlik güzəştli siyasət Avropa və ABŞ-nin sifarişidir? Gürcüstanda formalaşacaq yeni hökumət sözügedən sazişi hansı formada icra edəcək? Bundan sonra Azərbaycan-Gürcüstan münasibətləri necə inkişaf edəcək?