Qazaxıstandan AZAL təyyarəsinin qəzası ilə bağlı təcili məlumat

Qazaxıstanın Baş nazirinin müavini Kanat Bozumbayev dekabrın 25-də Aktau yaxınlığında qəzaya uğayan AZAL-a məxsus təyyarənin “qara qutu”sunun məlumatlarının internetə sızmasını şərh edib.

Baş nazirin müavini mətbuat konfransında bildirib ki, “qara qutu”ların oxunmasında Qazaxıstan, Rusiya, Azərbaycan və Braziliyadan olan ekspertlər iştirak ediblər.

“Hamı bərabər çıxışa malik olub. Mən internetə sızdırılmış danışıqları dinlədim. Mənə elə gəlir ki, bu daha çox yerüstü danışıqlar, yerlə danışıqlar idi. Orada ekipaj üzvlərinin danışıqlarını eşitmədim. “Qara qutu”da kapitan, pilot və ekipaj üzvlərinin apardığı bütün danışıqlar var. Buna əsasən başa düşdüm ki, bu bizim istintaq qrupundan sızma deyil”, – Baş nazirin müavini bildirib.

Kanat Bozumbayevin sözlərinə görə, internetdə dərc olunan stenoqramlar “qara qutu”ların məzmunundan fərqlənir:

“İnternetdə kiminsə nəsə dərc etməsi bunun həqiqət olduğu anlamına gəlmir. Dərc olunan materialda böyük fərqlər var. Buna görə də rəsmi mənbələrin məlumatlarını gözləyin. Nə baş verib, nə vaxt baş verib, ekipaj özünü necə aparıb, peşəkar və ya qeyri-peşəkar yerdən hansı əmrlər verilib. Düşünürəm ki, bu materialların açıqlanması bir çox uydurmaya son qoyacaq”.