Qırğızıstanlı nazirlər COP29-la bağlı təəssüratlarını bölüşdü | Bizim ortaq maraqlarımız var!

BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası artıq dördüncü gündür işini uğurla davam etdirir.

Konfransda iştirak edən 190-dan çox ölkənin əksəriyyətinin stendləri Yaşıl Zonada olduğu kimi, Mavi Zonada da quraşdırılıb.

Baku TV iştirakçı ölkələrdən olan Qırğızıstanın energetika naziri Taalaybek İbrayevdən COP29 haqqında təəssüratlarını öyrənib.

“COP29 yüksək səviyyədə təşkil olunub. Qırğızıstan nümayəndələrinin hər yarım saatdan bir digər ölkələrin nümayəndələri ilə işgüzar görüşləri keçirilir, bu da onu deməyə əsas verir ki, COP29 çox səmərəli bir tədbirdir.

Noyabrın 15-də Azərbaycan və Qırğızıstan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində energetika sahəsində əməkdaşlığa dair “yol xəritəsi” imzalayacaq.

Hesab edirəm ki, COP29 iki ölkənin energetika nazirləri arasındakı münasibətləri daha da yaxşılaşdırıb. Bizim ortaq maraqlarımız var. Azərbaycan tərəfinin su, külək və günəş stansiyalarının tikintisinə, Qırğızıstanın isə avadanlıq tədarükünə marağı var”, – deyə nazir qeyd edib.