Qriqoryan və Şoyqu nələri müzakirə etdi? | Gündəmdə olan əsas məsələ diqqət mərkəzində

Ermənistanın Təhlükəsizlik Şurasının katibi Armen Qriqoryanla rusiyalı həmkarı Sergey Şoyqu arasında telefon danışığı olub.

Bu barədə ölkə mediası məlumat yayıb.

Qriqoryan Vaşinqtonda 2 ölkə arasında əldə edilmiş razılaşmaların təfərrüatı barədə Rusiya rəsmisinə informasiya verib. O, bölgədə artıq sülhün bərqərar olunduğuna əminliyini də ifadə edib.

Katibin sözlərinə görə, bu, regiondakı bütün ölkələrin maraqlarına cavab verən bir hadisədir.

Bundan əlavə, regionda kommunikasiya yollarının açılması və bunun nəticəsində yaranacaq iqtisadi imkanlar da müzakirə olunub. Bu imkanların bütün ölkələrin maraqları baxımından əhəmiyyəti vurğulanıb.

Şoyqu isə öz növbəsində Rusiya Prezidenti Vladimir Putinlə ABŞ Prezidenti Donald Tramp arasında Alyaskada baş tutmuş görüşün nəticələri və bundan sonra atılacaq addımlarla bağlı həmkarını məlumatlandırıb.

Qeyd edək ki, telefon danışığı zamanı tərəflər Ermənistan ‒ Rusiya münasibətlərini əhatə edən məsələləri də müzakirə ediblər.