Qubada yəhudilərin "Qurtuluş və Nicat Günü"nə həsr edilən sərgi keçirildi

Dağ Yəhudilərinin İrsi Mərkəzində yəhudi xalqının məhv edilməkdən xilas olması rəmzini daşıyan “Qurtuluş və Nicat Günü”nə həsr edilən sərgi keçirilib.

Qırmızı qəsəbədə təşkil olunan tədbirdə yəhudilərin İkinci Dünya müharibəsi zamanı üzləşdikləri müsibətlərdən bəhs olunub, faşist Almaniyasının yürütdüyü siyasət nəticəsində həyatını itirənlərin xatirəsi yad edilib.

Bildirilib ki, bu dini təqvim dünyada yaşayan yəhudilər tərəfindən xüsusi qeyd olunur və böyük əhəmiyyət kəsb edir.

Azərbaycanda məskunlaşan dağ yəhudiləri də bu günə xüsusi önəm verirlər. Dağ Yəhudilərinin İrsi Mərkəzinin direktoru İqor Şaulov müharibə dövründə nasist Almaniyası tərəfindən işğal olunmuş ölkələrdə yəhudilərə qarşı həyata keçirilən soyqırımının, amansız təqiblərin onların tarixində dərin və kədərli iz buraxdığını qeyd edib, qırğınlar zamanı ölənlərin hər zaman dərin hörmət və ehtiramla yad edilməsinin vacibliyini vurğulayıb.

Sərgidə iştirak edən İsrailin Azərbaycandakı səfiri Corc Dik İkinci Dünya müharibəsi dövründə 680 min azərbaycanlının da vuruşduğunu və onlardan 300 min nəfərin döyüşlərdə həlak olduğunu xüsusi ehtiramla xatırladıb.

“Biz göstərmək istəyirik ki, “Holokost” qurbanlarının xatirəsini hər zaman xatırlayırıq, yad edirik. Bu müharibədə öz həyatını itirmiş yüzminlərlə azərbaycanlını da unutmayacağıq. Biz Azərbaycan xalqına öz təşəkkürümüzü bildiririk ki, müxtəlif dinlərə mənsub xalqların burada sülh şəraitində yaşamasına öz dəstəyini göstərir”, – deyə o əlavə edib.