"Ağır xəstə olduğunu bilə-bilə hər şeyi etdi ki..." | Heydər Əliyev: Mədəni siyasət - ARAŞDIRMA

Baku TV-nin efirində yayımlanan reportajda ümummilli lider Heydər Əliyevin mədəniyyət, ədəbiyyat və incəsənətin inkişafındakı misilsiz rolundan bəhs olunub.

Reportajda Xalq rəssamı Ömər Eldarovun xatirələri xüsusi diqqət çəkib.

O bildirib ki, Heydər Əliyevin mədəniyyət sahəsinə münasibəti son dərəcə məsuliyyətli və tələbkar idi. Xalq rəssamının sözlərinə görə, Heydər Əliyev ağır xəstə olmasına baxmayaraq, Rəssamlıq Akademiyasının yaradılmasını həyatının ən vacib məsələlərindən biri hesab edirdi:

“Bu barədə danışmaq çətindir. O bilirdi ki, müalicədən qayıtmaya bilər. Buna baxmayaraq, bütün gücünü toplayaraq Rəssamlıq Akademiyasının açılması üçün lazım olan hər şeyi etdi. Bütün aidiyyəti qurumları bir araya gətirdi, hər kəsi səfərbər etdi. Kim maliyyə ayırmalı idi, kim Akademiyanın yerini müəyyənləşdirməli idi – hər kəsə konkret tapşırıqlar verdi. Məqsədi o idi ki, iş yarımçıq qalmasın”.

Ömər Eldarov həmçinin qeyd edib ki, Heydər Əliyev öz heykəlinin ucaldılmasına qəti şəkildə qarşı idi və bu mövzuda deyilən sözlərə sərt reaksiya verirdi:

“Belə söhbətlər olanda “bu nədir, boş-boş işlərlə məşğul olursunuz” deyə əsəbiləşirdi. Halbuki onun heykəlini yaratmaq istəyən sənətkarlar çox idi”.