"Gürcü Arzusu"ndan İlham Əliyevə təşəkkür | Dostluq münasibətlərimiz hər zaman bu cür davam etsin!

“Salome Zurabişvilinin müxtəlif vaxtlarda Azərbaycan-Gürcüstan dostluğuna kölgə salacaq bəyanatları barədə danışmaq istəmirəm. Onun çıxışları bizim münasibətlərə heç bir təsir göstərməyib”.

Bu barədə Gürcüstanın 6-cı Prezidentinin andiçmə mərasimi zamanı keçirilən mətbuat konfransında hakim partiyanın icraçı katibi Mamuka Mdinaradze bildirib.

O qeyd edib ki, Azərbaycan-Gürcüstan əlaqələri “Gürcü Arzusu” Partiyasının hakimiyyəti dönəmində elə gün olmayıb ki, ən yüksək səviyyədə olmasın:

“Mən bunun üçün cənab Prezident İlham Əliyevə təşəkkürümü bildirmək istəyirəm. Dövlətlərimiz və xalqlarımız arasında dostluq münasibətləri hər zaman bu cür davam edəcək”.

Gürcüstan parlamentinin Xarici əlaqələr komitəsinin sədri Nikoloz Samxaradze yeni seçilən Prezident Mixeil Kavelaşvilinin Azərbaycan-Gürcüstan münasibətlərinə öz töhfəsini verəcəyinə əminlik ifadə edib:

“Azərbaycan bizim yalnız strateji tərəfdaşımız deyil, həm də çox önəmli dostumuz və qonşumuzdur. Hakim “Gürcü Arzusu” Partiyası və bütövlükdə Gürcüstan siyasətində Azərbaycanla əlaqələr hər zaman prioritet məsələdir. Ona görə də biz bu münasibətlərin daha da dərinləşdirilməsinə və inkişaf etdirilməsinə davam edəcəyik. Yeni seçilən Prezidentimiz də Azərbaycan-Gürcüstan münasibətlərinə öz töhfəsini verərək bu münasibətlərə daha böyük dinamika qazandıracaq”.