"Müharibə başa çatdı, amma..." | Prezidentdən "Əl-Ərəbiyyə" kanalına diqqətçəkən açıqlamalar

“44 günlük Vətən müharibəsi nəticəsində Azərbaycan öz ədalətini, beynəlxalq hüququ və ləyaqətini bərpa etdi, torpaqlarını geri qaytardı. Müharibədən sonra vasitəçilər hansı addımı atmalı olduqlarını bilmirdilər və məhz Azərbaycan Ermənistanla sülh prosesinə başlamağı təklif edib”.

Bu sözləri Prezident İlham Əliyev “Əl-Ərəbiyyə” kanalına müsahibəsi zamanı söyləyib.

Dövlət başçısı bildirib ki, Azərbaycan danışıqlar formatının təşəbbüskarı olub və sülh sazişinin layihəsini təqdim edib.

“Əslində, avqustun 8-də Vaşinqtonda paraflanmış sənəd Ermənistan – Azərbaycan münasibətlərinin dövlətlərarası çərçivədə necə qurulmalı olduğu barədə Azərbaycanın baxışına əsaslanır”, – deyə o əlavə edib.

Prezident İlham Əliyev qeyd edib ki, danışıqlar bir neçə il davam edib və Vaşinqtonda Prezident Trampın və onun komandasının dəstəyi ilə başa çatıb. O, bunun münaqişənin və müharibənin sonu olduğunu vurğulayıb.

Dövlət başçısı sülh sazişinin formal olaraq imzalanmamasının səbəbi kimi Ermənistan konstitusiyasında Azərbaycanın ərazi bütövlüyünü şübhə altına alan müddəanın qalmasını göstərib. O əlavə edib ki, Ermənistan həmin müddəanı dəyişdirdikdən sonra, yəni Azərbaycanın ərazi bütövlüyünə qarşı iddialar konstitusiyadan çıxarıldıqdan sonra formal sülh sazişi imzalanacaq.

“Fakt budur ki, Azərbaycan və Ermənistanın Ağ Evdə Prezident Trampın iştirakı ilə sənədi paraflaması müharibənin başa çatdığını göstərir. Bu, mərhələlərlə 30 ildən artıq davam edən müharibənin sonudur və həm Cənubi Qafqaz, həm də daha geniş mənada Mərkəzi Asiya və Yaxın Şərq üçün tamamilə yeni imkanlar açır”, – İlham Əliyev bildirib.