Regionda gərginliyi artıran amil | Cənubi Qafqazı nələr gözləyir?

“2025-ci ildə Azərbaycan və Ermənistan arasında sülh prosesinin gedişi əsasən tərəflərin mövqeyi və ictimaiyyətin təsiri ilə bağlı olacaq”.

Bunu siyasi şərhçi Aqil Məmmədov deyib.

O bildirib ki, hazırda sülh müqaviləsi üçün ilkin razılaşmaların böyük hissəsi əldə edilib:

“Azərbaycan tərəfinin də açıqladığı kimi, tərəflər arasında müzakirə edilən sülh müqaviləsi əsasən preambula və 17 maddədən ibarətdir. Bunun da 90 faizi razılaşdırılıb. Qalan 2 maddə üzərində isə tərəflər müzakirəni davam etdirirlər”.

Aqil Məmmədov vurğulayıb ki, regionda gərginliyi artıran amillər də var və bunlar daha çox Ermənistan tərəfindən icra olunur:

“Ermənistan silahlanma fəaliyyətlərini və hərbi xərclərini artıraraq gərginliyin artmasına təsir göstərir. Bu, regionda dayanıqlı sülhün əldə olunması üçün ciddi təhdidlər formalaşdırır.

Eyni zamanda Ermənistana Fransa və digər anti-Azərbaycan qüvvələri tərəfindən göstərilən hərbi dəstək tərəflərin sülh müqaviləsinə yaxınlaşmasına maneələr törədə bilər. Əgər bu məsələlər həll olunsa, uzunmüddətli sülhün təmin olunması reallaşa bilər”.