Rəsmi Bakı ilə Qarabağ ermənilərinin görüşünə mane olmaq istəyənlər var

Hazırda Yevlaxda rəsmi Bakı ilə Qarabağ bölgəsində sıx məskunlaşan erməni etnik azlıq nümayəndələri arasında görüşün təşkili üzərində iş gedir.

“Caliber”in verdiyi məlumata görə, görüşün təşəbbüskarı heç bir halda üçüncü ölkə deyil. Xarici dövlətlərin nümayəndələrinin iştirakı olmadan eksklüziv olaraq mərkəzi hakimiyyət nümayəndələri ilə erməni etnik azlığı arasında baş tutacaq dialoq Bakının məlum təklifinin məntiqinə uyğundur.

Təəssüf ki, erməni mətbuatına sızan bəzi məlumatlara görə, indi Qarabağın erməni icmasının bəzi nümayəndələri bu görüşə mane olmağa çalışırlar. Bu, son dərəcə destruktiv mövqedir, çünki regiondakı problemlər yalnız Qarabağ erməniləri ilə Bakıdakı mərkəzi hökumət arasında birbaşa dialoq çərçivəsində həll edilə bilər.

Qeyd edək ki, Milli Məclisin deputatı Ramin Məmmədov Azərbaycanın Qarabağ bölgəsində yaşayan erməni sakinlərlə təmaslar üzrə məsul şəxs qismində müəyyən edilib. Parlamentari martın 1-də Xocalı şəhərində Azərbaycan ərazisində müvəqqəti yerləşdirilmiş Rusiya Federasiyası sülhməramlı kontingentinin qərargahında Azərbaycanın Qarabağ bölgəsində yaşayan erməni sakinlərin təmsilçiləri ilə görüşüb.

Azərbaycan Prezidentinin Administrasiyası martın 1-də Xocalı şəhərində keçirilmiş görüşün və martın 13-də təqdim edilmiş dəvətin davamı olaraq Qarabağın erməni ictimaiyyətinin nümayəndələrini reinteqrasiya, həmçinin Qarabağda infrastruktur layihələrinin icrası məsələlərinin müzakirəsi məqsədilə aprel ayının birinci həftəsi Bakı şəhərində görüşün keçirilməsini bir daha təklif edib. Lakin qarşı tərəf bu təkliflərdən imtina etmişdi.