Rumıniyada Azərbaycanın COP29 Prezidentliyində irəli sürdüyü təşəbbüslərə həsr olunan tədbir

Noyabrın 5-də Rumıniyanın aparıcı universitetlərindən biri, beş min tələbənin təhsil aldığı Rumın-Amerikan Universitetində “COP29: Azərbaycanın Prezidentliyində yaşıl gələcək naminə təşəbbüslər və çağırışlar” adlı dəyirmi masa keçirilib.

Tədbir Azərbaycanın Rumıniyadakı Səfirliyi və Rumın-Amerikan Universitetinin birgə təşkilatçılığı ilə baş tutub.

Tədbirdə universitetin rəhbərliyi, Rumıniyanın beyin mərkəzlərinin nümayəndələri, universitetdə təhsil alan xarici və yerli tələbələr iştirak ediblər.

Universitetin rektoru professor Kostel Negriçea universitetin iqlim dəyişmələri və fəsadları, planetimizin ekologiyasının qorunmasına yönəlmiş elmi layihələrdə iştirakı barədə danışıb.

Səfir Qüdsi Osmanov tədbir iştirakçılarına COP29 çərçivəsində Azərbaycanın strateji hədəfləri, yanaşmaları və prioritetləri barədə məlumat verib. Həmçinin “Xəzər-Avropa Birliyi Yaşıl Enerji Dəhlizi”nin perspektivləri barədə danışıb.

Diplomat Azərbaycan tərəfindən COP prosesinə yenilik gətirəcək təşəbbüsləri, İqlim Maliyyəsi üzrə Fəaliyyət Fondunun yaradılması, Qlobal Atəşkəs Çağırışını xüsusi vurğulayıb.

Digər çıxış edənlər dünyada, əsasən Avropada baş verən təbii fəlakətlərin arxasında iqlim dəyişmələri problemindən söz açaraq, Azərbaycanın irəli sürdüyü təşəbbüslərin mahiyyətinə toxunublar.