Rumıniyalı senatordan dostluq mesajı | Qarabağ səfərindən sonra "Heydər Əliyev" zirvəsi

Azərbaycanda səfərdə olan Rumıniya Senatının Maramureş viləyətindən seçilmiş üzvü, Senatın mədəniyyət və media komitəsinin sədri, həmçinin Rumıniya ‒ Azərbaycan parlamentlərarası dostluq qrupunun üzvü Kristian-Avqustin Nikulesku-Tsıqırlaş “Heydər Əliyev” zirvəsinə qalxıb.

Rumıniyalı senator burada ulu öndər Heydər Əliyevin xatirəsinə ehtiramını ifadə edərək, onun Azərbaycan tarixində oynadığı misilsiz rolu vurğulayıb.

O, yürüşünü Rumıniya ‒ Azərbaycan dostluq və strateji əməkdaşlıq əlaqələrinə həsr etdiyini bildirib.

Senator Qarabağa səfərini də xatırladaraq, Prezident İlham Əliyevin bölgəyə göstərdiyi xüsusi diqqətin və aparılan genişmiqyaslı bərpa işlərinin şahidi olduğunu qeyd edib.

Onu Azərbaycanın Rumıniyadakı səfiri Qüdsi Osmanov, Alpinizm Federasiyasının baş katibi Sənan Rəsulov və alpinist Sima Səfərova müşayiət ediblər. Heyət həmçinin Bazardüzü zirvəsini fəth etmiş rumın alpinistlərlə görüşüb. Rumıniyalı alpinistlər Azərbaycanın əsrarəngiz təbiəti, qonaqpərvərliyi və isti münasibəti barədə təəssüratlarını bölüşüblər.

Qeyd edək ki, “Heydər Əliyev” zirvəsi Böyük Qafqaz sıra dağlarının Başdağ silsiləsinin Qızıl Qaya massivində, dəniz səviyyəsindən 3751 metr yüksəklikdə yerləşir.