Rusiya Ermənistanı dialoqa çağırdı

“İrəvanda həqiqətən də Moskvanın ünvanına çıxışlar səsləndirilir, ona görə də Rusiya tərəfi Ermənistanı normal dialoqa çağırır”.

Bu barədə Rusiya Xarici İşlər Nazirliyinin rəsmi nümayəndəsi Mariya Zaxarova Ermənistan Təhlükəsizlik Şurasının katibi Armen Qriqoryanın Azərbaycanla əlaqələrin açılması məsələsində sərhəd xidmətini yalnız Ermənistanın həyata keçirəcəyinə dair “News.ru” portalının sualını cavablandırarkən deyib.

“İstərdim ki, A.Qriqoryan qərar versin, ya Ermənistan tərəfi ilə normal dialoq baş tutacaq, ya da buna bənzər bəyanatlar. Biz birincini seçirik. Kommunikasiyaların açılması mövzusuna gəlincə, bu məsələ Rusiya, Azərbaycan və Ermənistan baş nazirlərinin müavinləri tərəfindən işlənilir”, – deyə o bildirib.

Rusiyalı diplomat Azərbaycanla Ermənistan arasında müzakirəsi aparılan sülh müqaviləsi məsələsi ilə bağlı sualı da cavablandırıb.

Qeyd edib ki, Brüssel və Vaşinqton əvvəllər İrəvan və Bakı arasında danışıqlarda xüsusi fəallıq göstərmirdilər, indi isə vəziyyət dəyişib. Onun fikrincə, tərəflər sülh yolu ilə nizamlanma üçün “səmimi olmalıdırlar”.

“Kənardan tətbiq edilən sülhsevər düsturlar, xüsusən də sürətləndirilmiş rejimdə tətbiq olunanlar heç zaman yaxşı nəticəyə gətirib çıxarmayıb. Eyni zamanda Moskva Ermənistanla Azərbaycan arasında üçtərəfli formatda münasibətlərin normallaşmasına çalışır və üç ölkənin liderləri arasında imzalanmış sazişlər toplusunu mübahisəsiz “yol xəritəsi” hesab edir”, – deyə M.Zaxarova əlavə edib.

Diplomat vurğulayıb ki, işlər plan üzrə gedir və tərəflərin yaxınlaşması, həll yollarının hazırlanması Moskva üçün prioritet olaraq qalır.